Rom 7 | KYG | STEP | Konaga'nimogitapae, lapakaemo ke'aepa gemo ago afi'naya'mofe'mo hisuva gemo afa'a afigae. Lapakaemo ago afi'nayana ke'aepa gemo'mo ofali'a afa'a ne'maiya afina'mo muki vaya'aite'mo yagaino ne'apate.

Romans 7

Vele ne'maiya kavafe'mo aeno kalafefa gemo hu'niya gemae

1 Konaga'nimogitapae, lapakaemo ke'aepa gemo ago afi'naya'mofe'mo hisuva gemo afa'a afigae. Lapakaemo ago afi'nayana ke'aepa gemo'mo ofali'a afa'a ne'maiya afina'mo muki vaya'aite'mo yagaino ne'apate. 2 Ani kavatefe'mo ke'aepa gemo'mo a kanomo'a anau'amo'mo ofalino afa'a mai'niya afina'mo a kanoe'mo huno'ae'mo, anaukamo'e'mo magokepi alagepa hutana lokaetana mai'ao, huno nehiye. Nehiya'monanafa anau'amo'mo falisiyana anau'amo'e'mo magokepi lokaeno ne'maiya ke'aepa gemo afe'alumelagamo o'maino afa'a maigiye. 3 Maigiya'mofe'mo mago a kanomo'a anau'amo'mo afa'a mai'nisigeno'ae'mo ataleno uno alu vele'mo maisiyana kumai ane, hu'a hugae. Hugaya'monanafa anau'amo'mo falitesigeno'ae'mo uno alu vele'mo maisiyana anau'amo'e'mo magokepi lokaeno ne'maiya ke'aepa gemo'mo mago'e huno yagaino o'ategaiya'mofe'mo kumai ane, hu'a afa osugae. 4 Konaga'nimogitapae, mani gemo lapakaefeke'mo nehuve. Lapakaemo alu vekale'mo maisayafe'mo Kalaisi agufa'aleti'mo ke'aepa ge'alefe'mo ago fali'nae. Kanolufati'mo ago alino he tino ate'niya vekale'mo mai'netapa Gotitegamo alagamo aegekana hutapa alagepa kava'mo hisayafeke'mae. 5 Atafa laipamo'mo yagaino late'niya afina'mo ke'aepa gemo'mo hosu laha'ye nehiya kava'mo alino afole aino ate'nigeno lagufafi'mo ali'ya'mo ali'nigeta hosu alagamo aegekana huta mai'netae'mo falisuna agufa kava'mo hu'none. 6 Hu'nona'monanafa hemenimo ke'aepa gemo'a nofi aeno late'niya gelefe'mo fali'nonageno'ae'mo Goti'a ago hatu maeno late'niye. Hemenimo Goti ge'amo akame nehutae'mo mago'e huta atafa gemo avo kae male'niya ke'aepa gemo'a ma kava hiyo ina kava osiyo huno hu'niya kate'mo no'una'monanafa saufa ka'mo Goti Auneme'amo'mo valino nelateya kateke'mo ne'une.

Ke'aepa ge'e hosu kava'efe'mo hu'niya gemae

7 Ani kava'mo nehiya'mofe'mo ke'aepa ge'ae'mo hosu gemo hane'niye, huta hisupiye. Ha'ao, alagi atalegeno hano hino. Goti ke'aepa ge'amo'a hosu kava'nimo alino nave oli'niyesinana o'age'novesine. Ke'aepa gemo'a,lapa'ye osino, huno osu'niesinana naipafi'mo naha'ye nehiya kava'nimo o'age'novesine. 8 Naipafi hosu kava'nimo'a alu hosu kava alu hosu kavafe'mo naha'ye nehiya kava'nimo alino he tino atesiya ka'mo ago age'niye. Ageteno'ae'mo ke'aepa geleti'mo hosu naha'ye nehiya kava'nimo alino afole aino ate'niye. Ke'aepa gemo afole o'ai'nigeno'ae'mo hosu kava'nimo'a faligekana huno hane'niye. 9 Ke'aepa gemo afole o'ai'nige'nae'mo, afa'a alagepa hu'na mai'nove, hu'na nagesa afi'nova'monanafa ke'aepa gemo naipafi'mo afole ai'nigeno'ae'mo hosu kava'nimo'a naipafati'mo he ti'nige'na fali'nove. 10 Goti'a ofali'a afa'a maisayafe'mo ke'aepa gemo hu male'niya'monanafa ke'aepa gemo'a namagi'nige'na fali'nove. 11 Hosu kava'mo'a ka'mo ageteno'ae'mo ke'aepa geleti'mo humi nateteno namagi'nige'na fali'nove. 12 Inagi muki ke'aepa gemo aote gemo hane'nigeno magoke magoke ke'aepa gemo'a ma kava hiyo ina kava osiyo, huno hu'niya gemo aote alagepa fatago gemo hane'niye.

Polo aipafi'mo kame nehiya kavafe'mo ava gemo hu'niya gemae

13 Alagepa gemo'a nagaete'mo fali kava'mo alino afole aino ate'nifiye. Ha'ao, alagi atalegeno hano hino. Hosu kava'mo'a hosu kava'nimo afole aisige'na age'na aeto hisuvafe'mo alagepa ge'aleti'mo naipafi'mo fali kava'nimo alino he tino ate'niye. Goti'a ke'aepa ge'aleti'mo, hosu kavafe'mo alagi hosu faipa kava'mo hane'niye, huno alino nave lisiyafe'mo ani kava'mo hu'niye. 14 Ago afi'nonana Goti Auneme'amo'mo haiya agufa aipa'e vekamo mai'nifi ani kava huno Goti ke'aepa ge'amo hane'niye. Hane'niya'monanafa nagaemo atafa naipa'e vekamo mai'nove. Na kava hige'naene. Naipafi'mo hane'niya hosu kava'nimo'a kalavusi huno nate'nige'na ali'ya'amo ali'na mai'nove. 15 Nehuva kavafe'mo o'nahau'niye. Nahau'niya kava'mo nosufa alagi o'nahau'niya kava'mo nehuve. 16 Hosu kava'mo nehu'nae'mo o'nahau'niya'mofe'mo ke'aepa gemo'e naipamo'e'mo magoke agufa gemo neha'ae. 17 Ani kava'mo nehuva'mofe'mo nagai'nimo nosufa naipafi'mo hane'niya hosu kava'mo'a nehiye. 18 Ago age'novana mago alagepa ya'mo naipafi'mo ohane'niye. Atafa naipafifeke'mo nehuve. Muki afina'mo alagepa kava'mo hisuvafe'mo nahau'niya'monanafa alagepa kava'mo hisuva ka'mo no'agove. 19 Alagepa kava'mo huguve, hu'na nehuvana nosuve. Hosu kava'mo osuguve, hu'na nehuvana afa'a nehuve. 20 Osuguve, hu'na nehisuvana nagai'nimo nosuva'monanafa naipafi'mo hane'niya hosu kava'mo'a nehiye. 21 Nagaemo alagepa kava'mo huguve, hu'na nehugeno'ae'mo hosu kava'mo'a nagae'e'mo magokepi lokaeno mai'neno naipafi'mo lokiya ali'ya'mo ne'alige'na ne'agove. 22 Nagaemo saufa naipafati'mo Goti ke'aepa ge'ae'mo nahau'nige'na namogaga ne'auva'monanafa 23 aeto agufa lokiya ya'mo'a nagufafi'mo ali'ya ne'aliye. Ani lokiya ya'mo'a saufa naipafi'mo hane'niya lokiya yate'mo kame huno ne'ate. Kame huno ateteno kalavusi huno ne'nategeno'ae'mo hosu lokiya ya'mo'a nagufafi alu ya alu ya'nile'mo lokiya'amo'a yagaino ne'nate. 24 Vaehae, lusi kanamo alite'na hosu kava'mo hu'na mai'nove. Hosu kava'nimo'a nagufale'mo yagaino nate'neno falisuvategamo navalelino ugefe'mo nehiyanageno ina la'mo nagufa'nimo alino katino nategaiye. 25 Goti'a Ala kava netimo Yesu Kalaisiteti'mo nagufa'nimo afa'a alino katino nategaiye. Agaefeke'mo hao ke nehove. Ani kava'mo hu'na mai'ne'nae'mo saufa naipafati'mo Goti ke'aepa ge'amo akame nehuva'monanafa atafa naipafati'mo hosu kava'nimo lokiya'amo akame nehuve.